3rd November – 8th November 2025
wi Hannah Rarity an Billy Letford, an Guest reader Amanda Thomson
Hiv ye aye kent that ye wantit tae scrieve in Scots? Dae ye hear muisic in aw its wirds an rhymes?
This taucht retreat is for awbody wha’s ever wantit tae or wha’s a’ready warkin tae scrieve sangs, poems or stories in the Scots leid.
Baird Hannah Rarity an makar Billy Letford will haud wan-tae-wan tutorials wi ye ower the week tae gie ye a haun creatin new wark in Scots. The lave o the time will be yours tae explore whit ye can dae wi the Scots leid, readin Scots buiks in Moniack Mhor’s leebraries, an communin wi ither coorse participants wha are scrievin in Scots an aw.
Ye’ll be jined mid-week by scriever Amanda Thomson wha’ll read fae her wark an blether tae aw by the fire.
Wha’s it fur?
Onybody new tae or a’ready scrievin sangs or poems or stories in Scots.
Can a git help tae come?
Aye! Creative Scotland are fundin twa places on this coorse for sang-scrievers an twa places for makars or scrievers a’ready warkin in Scots an wha are keen tae lear an develop mair skeels. This funding includes ony access support an traivel expenses anaw.
If ye want tae apply for wan o thir funded places, email us on awards@moniackmhor.org.uk an tell us why ye wid like tae jine this taucht retreat, an if ye are mair interestit in sang-scrievin, or scrievin poems or stories. Please gie us a swatch o ony wark ye’ve a’ready daen an aw, eg up to three poems or sangs, 500 wirds o prose etc.
Please send yer application sae suin as ye can, an by 7 August 2025 at the latest. We’ll lat ye ken aboot the ootcome o yer application by the stert o September or afore.